Vikingskipet «Draken Harald Hårfagre» skal ha heimehamn på Jørpeland i eitt års tid. Viking Nilsson for Draken

Etter meir enn sju år som publikumsmagnet i amerikanske farvatn skal «Draken Harald Hårfagre» nå bli ein ny attraksjon i Strand kommune – i tillegg til Preikestolen.

Skipet blir liggande i Jørpelandsvågen i eitt års tid framover.

Strand kommune er stolte over å vera ny «heimehamn» for Draken, og ønsker å ta imot skipet på best mogleg vis.

Ordførar Irene Heng Lauvsnes oppmodar derfor strandbuar og andre interesserte til å møta opp i Jørpelandsvågen til klokka 17 fredag – for å skapa ein skikkeleg mottakingsfest for det verdskjente skipet.

– Ta med flagg, og still gjerne i finstasen. Me ønsker å få til ein skikkeleg folkefest for store og små. Det er veldig stas at dei av alle hamner har valgt Jørpeland, seier ordføraren.

Oppmodar båtfolket til å slå følgje

Også konstituert leiar for kultur og næring i Strand kommune, Elin Aasheim Rossemyr, håpar på folkefest i Jørpelandsvågen fredag ettermiddag. 

– Me oppmodar dei som har båtar til å følgja vikingskipet under innseglinga, slik som då NRK Sommerskuta, Statsraad Lehmkuhl, besøkte Jørpeland i 2021, seier Aasheim Rossemyr.

Oppmodinga til båtfolket er å følgja skipet på trygg avstand.

Under Strandadagane laurdag og søndag kan du, mot betaling, få guida omvising på vikingskipet. 

Jørpeland bra av ulike årsaker

Når skipet ikkje har vore på tur i tida i USA, har skipet hatt heimehamn i Mystic Seaport Museum, noko som er rekna som eit av dei fremste maritime musea i verda. Der har Draken vore ein svært populær turistattraksjon.

Neste heimehamn blir altså Jørpeland.

– Jørpeland blir veldig bra for oss av ulike årsaker. Framfor alt har me mannskapsmedlemmer som bur i nærleiken som kan ta seg av det daglege vedlikehaldet av Draken, men me ana også frå starten av eit stort engasjement og interesse frå Strand kommune for å få ein god båtplass og eit godt opphald for skipet vårt, seier Emanuel Persson, dagleg leiar for skipet Draken.

TV-serie på NRK til hausten

«Draken Harald Hårfagre» har ein lengde på 35 meter og ein breidde på 8 meter.

Skipet blei bygd i Haugesund frå 2009-2012, og er det det største vikingskipet som er bygd i moderne tid.

Etter år med prøvesegling og trening, blei skipet sett segl i 2016 då det segla over Atlanterhavet til Nord-Amerika i kjølvatnet av Leif Erikson.

Etter meir enn sju år i Canada og USA har skipet gjort stort inntrykk på nordamerikanarar. 

Hundretusenvis av menneske har besøkt skipet og 50.000 amerikanske skulebarn har deltatt i aktivitetar på Draken.

Eit kanadisk produksjonsselskap laga ein TV-serie, «Viking Quest: America», med 6 episoder rundt Draken-prosjektet så seint som i fjor. 

Serien har så langt blitt sendt i 15 land rundt om i verda. Til hausten skal TV-serien også bli vist på NRK.

Produsentane er nå interesserte i å gjera fleire sesongar framover.

Les meir om «Draken Harald Hårfagre» på heimesidene deira.